draŭlany zedlik   S.B.IE.Ŭ.K.: čytaj, što pišuć
 


Artykuły
 
level up!

Łacinizuj!

Całkam zrazumiełym i lagičnym źjaŭlajecca imknieńnie čałavieka spraścić sabie žyćcio, i ludzi iduć na ŭsio novyja i novyja achviary dziela ažyćciaŭleńnia hetaha samaha pracesu spraščeńnia taho ci inšaha.

U svoj čas pragramisty darvalisia da łacinki i adrazu zrazumieli, što farmalna łacinka ad kirylicy adroźnivajecca chiba što tolki symbalami. Zrazumieli i adrazu stvaryli novuju pragramu — pieršy łacinizatar. Skazać, jakaja mienavita pragrama była pieršaj, ciažka, bo ŭ lubym vypadku znojdziecca aŭtar, jaki zakryčyć: «A ja jašče ŭ šaścidziasiatyja na perfakartach łacinizatary muciŭ». Mahčyma, tamu nia budziem vyśviatlać, chto byŭ pieršym, a vierniemsia da rečaisnaści.

Kanvertataraŭ z kirylicy ŭ łacinku zaraz raźviałosia stolki, što vyłučyć adzin lepšy z proćmy astatnich, nie pasprabavaŭšy karystacca kožnym, nadzvyčaj ciažka. Heta i źjaviłasia padstavaj dla praviadzieńnia adnosnaha paraŭnańnia łacinizataraŭ, dastupnych siońnia karystalniku. Takim čynam, u siońniašnim drive-teście udzieł biaruć: Biełazar v3.6.2.2015, CyrLat-HTML v1.1, Cyr/Lat Converter v1.10, Cyr2Lat, kirlat, Moŭny Kanvertar v2.3 i Kir2Lac v2.0.2. Akramia hetaha makrasy dla Microsoft Word cyrlat i word2000, a taksama try online-łacinizatary.

Dva słovy pra abstalavańnie i praces testavańnia

Testavańnie pravodziłasia na angielskaj WinXP Pro z vykarystańniem kodavaj tablicy windows-1251 dla nieunicodeavych pragramaŭ. Kanvertavałasia apovieść V.Bykava «Vaŭčynaja jama» (130Kb). Rejtyng vyličaŭsia jak siaredniaje arytmetyčnaje adznakaŭ, atrymanych łacinizataram za interface, chutkaść raboty, jakaść kanvertavańnia, najaŭnaść dadatkovych mahčymaściaŭ i zručnaść karystańnia vynikam raboty pragramy. Adznaki adnosnyja i pryviedzienyja mienavita ŭ takoj paśladoŭnaści. Aceńvałasia tolki častka pragramy, źviazanaja z łacinizavańniem kiryličnaha tekstu.

Pragramy

Biełazar v3.6.2.2015
Aŭtar: Aleh Azaroŭski
Staronka pragramy: belazar.belinter.net
Pamier: 1,9Mb (razam sa słoŭnikam)

Biełazar 3.6.2.2015

Taki svojeasablivy kambajn, pra jaki ŭžo chodziać lehiendy. Niekatoryja ź jahonaj dapamohaj pišuć sačynieńni, inšyja ž prosta abmiažoŭvajucca funkcyjaj pierakładu. I choć pierakład jašče nia vielmi daskanały, ŭ apošnich versijach pragramy źjaviłasia funkcyja ekspartu ŭ łacinku, a mienavita jana nas zaraz i cikavić. Pragrama moža zachoŭvać łacinku ŭ kadyroŭcy cp-1257 i ŭ farmacie HTML Unicode. U pieršym vypadku apovieść była kanvertavanaja ŭ łacinku za 1 sekundu, u druhim vypadku — za 54 sekundy. Ale jakaść kanvertavańnia vielmi nizkaja: słova «вераб'і» kanvertujecca ŭ «vierab'i» u toj čas, kali apostrafa ŭ łacincy ŭvohule nie isnuje, «у Балёньі» — u «u Balońi», «Заслаўе» pierajšło ŭ «Zasłaŭie». Fajna, što słova «ЯНКА» było łacinizavanaje ŭ «JANKA». Litara «g» uźnikaje ŭ vynikovym tekście ŭ tych i tolki tych vypadkach, kali pragrama sustrenie spałučeńnie litaraŭ «зг», što vielmi drenna, bo bolšaja častka «g» zastaniecca nieraspaznanaj, a taksama pragrama naŭtykaje lišnich «g» u słovach, dzie druhaja litara ŭ spałučeńni «зг» źjaŭlajecca frykatyŭnym hukam: naprykład, u spałučeńniach korania z prystaŭkaj. Pragrama całkam ignaruje litaru «ґ» i pieradaje jaje ŭ łacinku biez anijakich źmienaŭ. Było b dobra pry najaŭnaści ekspartu ŭ kadyroŭcy HTML Unicode zrabić mahčymaść aŭtamatyčnaj ustaŭki HTML-farmatavańnia, prynamsi pieranosu na novy radok. Nia moža pracavać biez ustaloŭki, što taksama nie źjaŭlajecca plusam dla jaje.
Rejtyng: 4.4 (8/2/2/5/5)

CyrLat-HTML v1.1
Aŭtar: Źm. Hulecki
Staronka pragramy: www.geocities.com/belarus_coins/cyrlat.html
Pamier: 1,1Mb (542Kb va ŭstalovačnym archivie)

CyrLat-HTML 1.1

Prahrama, jak heta zrazumieła z nazvy pryznačanaja tolki dla kanvertavańnia kirylicy ŭ łacinku i zachavańnia vyniku ŭ vyhladzie HTML-staronki ŭ adpaviednaj kadyroŭcy. Moža kanvertavać tekst jak sa źniešniaha fajłu, tak i z admysłovaha pola, kudy jaho treba ŭvodzić. Apovieść z fajła kanvertavałasia krychu mienš za 3 sekundy, z ekranu — za 7. Adrazu kidajecca ŭ vočy, što pragrama zamiest litary «ŭ» uparta vykarystoŭvaje «ū», choć u biełaruskaj łacincy vykarystoŭvajecca pieršaja, a Unicode dazvalaje vykarystoŭvać lubuju. Taksama nia vielmi spadabałasia, što praces ekspartu tekstu z pola na ekranie pragrama robić niapravilna z-za čaho ŭźnikajuć dadatkovyja pieranosy radkoŭ. Pra HTML-tegi pragrama taksama ničoha nia viedaje. Aproč taho, «вераб'і» byli pieratvoranyja ŭ «vierabi», «у Балёньі» — va «u Balońi», «зь Я.Чачотам» pieratvaryłasia ŭ «ź JA. Čačotam» — trabły z registram litaraŭ. Cikava jašče toje, što słova «функцыі» pragrama kanvertuje ŭ «funkcyji», a «у Заслаўі» — u «u Zasłaūi», choć praviła tut adno i toje ž.
/* Tut varta zaznačyć, što zaraz suisnujuć dva najbolš raspaŭsiudžanyja varyjanty klasyčnaj łacinki: taja, dzie huk [ji] pieradajecca jak «i» i taja, dzie jon pieradajecca jak «ji». Bolšaść łacinizataraŭ pabudavanyja pad pieršy varyjant, a hety, vidać, — pad druhi. Uvohule, kali nie skazana advarotnaha, treba ličyć, što kanvertatar vykarystoŭvaje pieršy varyjant łacinki. */
Słova «ЯНКА» tut taksama kanvertujecca ŭ «JANKA», što niesumnienna źjaŭlajecca plusam.
Rejtyng: 5.8 (8/9/4/1/7)

Cyr/Lat Converter v1.10
Aŭtar: Viktar Aŭtuška
Staronka pragramy: lng.belinter.net
Pamier: 479Kb (228Kb va ŭstalovačnym archivie)

Cyr/Lat Converter 1.10

Vakno pragramy padzielenaje na dźvie častki: u adnoj kiryličny aryginał, u druhoj — vyniki łacinizavańnia. Prahrama maje mahčymaść kanvertavańnia tekstu ŭ adnu z troch kadyrovak: CE, Baltic, ASCII. Uvohule, algarytm pracuje pravilna, ale, na žal, vynik duža zaležyć ad kadyroŭki, pryčym karystacca im ciažka (kali navat uvohule mahčyma) biez najaŭnaści Baltic codepage, jakaja jość daloka, daloka nia ŭ kožnaha. U kožnaj z kadyrovak «Jama» była łacinizavanaja za prykładna 10 sekundaŭ.
Rejtyng: 5.4 (6/6/9/4/2)

Cyr2Lat
Aŭtar: Marat Duchan
Spasyłka: dukhan.at.tut.by/latinka/Cyr2Lat.zip
Pamier: 14Kb (niepasredna biblijateka - 2Kb)

Nasamreč heta nie samastojnaja pragrama, a tolki funkcyja kanvertavańnia, dastupnaja ŭ farmacie lib i ŭ vyhladzie dll-biblijateki. Tamu najbolš zručnaj jana budzie pry vykarystańni ŭ inšych pragramach u jakaści, naprykład, jadra łacinizatara abo funkcyi lakalizacyi interfejsu pragramy na łacinku ŭ realnym časie. Funkcyja prymaje 3 parametry: tekst dla kanveratvańnia, bufer dla vyniku i daŭžyniu buferu. Chutkaść kanveratvańnia vielmi vysokaja: apovieść była apracavanaja za ŭsiaho tolki 0,3 sekundy. Ale chiba z «u Balońi» usio roŭna krychu sapsavała ahulnaje ŭražańnie.
Rejtyng: 5.25 (-/10/8/0/3)

Kirlat
Aŭtar: Alexander Mikhailian
Spasyłka: www.mova.org/~lowry/
Pamier: kala 50Kb

Kirlat

Roznyja versii hetaj pragramy chodziać pa internecie, ale znajści sajt, na jakim by jany raźmiaščalisia, nie atrymałasia. Cikava taksama, što versii nie numarujucca, ale čas ad času dapracoŭvajucca. Raspaŭsiudžvajecca pragrama razam z zychodnym kodam, žyvie ŭ systemnym trei i maje niekalki kirunkaŭ kanvertavańnia, siarod jakich kanvertavańnie z kirylicy ŭ łacinku i nazad. Prahrama pracuje praz bufer abmienu, kanvertujučy tekst, jaki tam znachodzicca, i pierazapisvajučy jaho vynikam. Apovieść była łacinizavanaja za 11 sekundaŭ, ale vyniki kanvertavańnia nia vielmi ŭrazili: «вераб'і» pieratvarylisia ŭ «vierab'i», «у Балёньі» — va «u Balońi», «Заслаўе» — u «Zasłaŭie», ignarujecca litara «ґ», niezrazumiełyja rečy adbyvajucca z adzinočnymi jotavanymi litarami (naprykład, kali heta inicyjały), taksama pa niezrazumiełych pryčynach jotavanyja litary ŭ niekatorych vypadkach pieradajucca z «i» u toj čas, kali musiać z «j». Zručnaja pragramka dla chutkaha kanvertavańnia nievialikich tekstaŭ, ale jana jašče musić być dapracavanaja.
Rejtyng: 5.0 (8/6/4/2/5)

Moŭny Kanvertar v2.3
Aŭtar: Juraś Michied
Staronka pragramy: www.juras14.net/open.php?r=5
Pamier: 43Kb (u archivie; mahčyma, spatrebicca dadatkovaja biblijateka: 58Kb u archivie)

Moŭny Kanvertar 2.3

Adna z najbolš daskanałych pragramak siońniašniaha ahladu. Maje tekstavaje pole, jakoje, vidać, pracuje ŭ kadyroŭcy Unicode, dzie, ułasna, treba redagavać tekst i hladzieć na vyniki. Taksama prysutničaje ručny vybar naboru symbalaŭ dla ŭvodu. Takaja mahčymaść vielmi zručnaja pry adsutnaści kiryličnaj abo łacinkavaj raskładki: pragrama pieratvaraje symbali klavijatury ŭ symbali adpaviednaj raskładki i vyvodzić ich na ekran. Chacia krychu naziralisia chiby, kali byŭ vybrany punkt «systemnaja»: symbali, jakija źjaŭlalisia na ekranie nie adpaviadali symbalam nacisnutych klavišaŭ u systemnaj raskładcy. Pragrama taksama maje zvyčku aŭtamatyčna pieraklučyć raskładku na, jak joj zdajecca, najbolš relevantnuju, ale heta bolš razdražniaje, bo pieraklučeńnie adbyvajecca ŭ bolšaści vypadkaŭ tady, kali rabić heta nia treba. Apovieść była łacinizavanaja za 2 chviliny 6 sekundaŭ. Davoli šmat. Taksama tut prysutničaje taja ž chiba ŭ «u Balońi», ale «у Заслаўі» kanvertavałasia ŭ «u Zasłaŭi», choć vidavočna, što pragrama pieradaje huk [ji] praz «ji». Dalej karystalniku prapanujecca mahčymaść zachavać vynik u adnym ź piaci farmataŭ, siarod jakich jość i Unicode. Symbali, jakija nie prysutničajuć u kodavaj tablicy zachavańnia zachoŭvajucca ŭ h.zv. «HTML-Unicode». Cikava, što kali vybrać u meniu punkt «Zachoŭvać u Unicode (HTML)», niekatoryja symbali zamiest Unicode-kodaŭ zachoŭvajucca ŭ adnoj z centralnaeŭrapiejskich kadyrovak, pryčym nie zrazumieła jakaja kankretna heta kadyroŭka. Aproč łacinizavańnia ŭ pragramie taksama prysutničajuć funkcyi kirylizavańnia i prymityŭnaha taraškievizavańnia.
Rejtyng: 6.2 (8/0/7/6/10)

Kir2Lac v2.0.2
Aŭtar: j.Zedlik
Staronka pragramy: www.zedlik.com/pragramy/kir2lac/
Pamier: 263Kb (ustalovačny archiŭ)

Kir2Lac 2.0.2

Pragramka z prostym interfejsam na dva poli — zychodny fajł, vychodny fajł — i pola, u jakoje vyvodziacca ŭsie słužbovyja paviedamleńni adnosna kanveratvańnia padčas raboty pragramy. Uvachodnymi źviestkami źjaŭlajecca plain text u kadyroŭcy cp-1251. Vynik pragrama moža zachavać jak taksama plain text u adnym z čatyroch režymaŭ: łacinkavyja symbali, jakija nie ŭvachodziać u kadyroŭku ASCII zamianiajucca adpaviednymi biaz hačykaŭ, zamianajucca na pseŭdałacinku z ' i ^, zamianiajucca na HTML kody i zamianiajucca na lubyja symbali, vyznačanyja karystalnikam. Taksama prysutničaje mahčymaść ekspartu fajła ŭ HTML-staronku z zachavańniem farmatavańnia, škada tolki, jano moža być vykananaje tolki razam z kanvertavańniem u tekstavy fajł. Z dadatkovych mahčymaściaŭ prapanujecca aŭtavyznačeńnie registru litaraŭ, jakija ŭ kirylicy pieradavalisia adnym symbalem, a ŭ łacincy — dvuma. I varta zaznačyć, jana navat krychu pracuje. «Vaŭčynaja jama» była łacinizavanaja za 8, 9 i 11 sekundaŭ u pieršych troch z vyšejzhadanych režymaŭ adpaviedna. Pamyłak kanvertavańnia nia vyjaŭlena. Vyrazy kštałtu «яНКА» i «ЯНКА» kanvertujucca ŭ, adpaviedna, «jANKA» i «JANKA». Darečy, isnuje onlinevaja versija hetaha łacinizatara (www.zedlik.com/pragramy/kir2lac-online/), ale jon całkam adpaviadaje win32-pragramie, tamu jak asobny łacinizatar nie razhladaŭsia.
Rejtyng: 7.8 (9/6/9/8/7)

Makrasy i online-łacinizatary

Makrasy dla Word i tym bolš online-łacinizatary — heta zusim inšaja vahavaja katagoryja i nia mohuć paraŭnoŭvacca z kampilavanymi binarnikami. Tamu ličby adnosna času kanvertavańnia pryviedzienyja chutčej dla paraŭnańnia adpaviednych kanvertavalnikaŭ pamiž saboj (to bok makrasaŭ z makrasami, a online-łacinizataraŭ — z online-łacinizatarami). Ale heta nie vyzvalaje ich ad naležnaj jakaści łacinizavańnia.

Cyrlat
Aŭtar: Alaksiej Kazan
Staronka pragramy: www.geocities.com/alaksiej (nie pracuje)
Pamier: 34Kb (ustalovačny archiŭ)

Cyrlat

Uvohule, makrasami nia vielmi zručna kanvertavać vialikija teksty. Mahčyma, značnuju rolu ŭ hetaj subjektyŭnaj acency hraje chutkaść kanvertavańnia, jakaja adčuvalna našmat mienšaja. Časam zdarajucca cikavyja rečy. Voś i pry łacinizavańni apovieści taksama było. Nieviadoma, jakim čynam pracuje makras, ale, naprykład, čverć «Jamy» — roŭna čaćviertaja častka — była łacinizavanaja za 13 sekundaŭ, pałova — užo za 51, a nie za 26, jak možna było b zdahadvacca. Całkam apovieść tak i nie była łacinizavanaja navat za čatyry z pałovaj chviliny. Pamyłka ź «vierab'i», z «u Balońi», «ґ» makrasu nie viadomaja, mahčymaść pieradačy dygrafaŭ dvuma litarami ŭ vierchnim registry taksama nie realizavanaja. Taki voś siaredniačok.
Rejtyng: 2.5 (-/0/6/0/4)

Word2000
Aŭtar: nieviadomy
Staronka pragramy: nieviadomaja, jość na www.lacinka.org
Pamier: 40Kb (ustalovačny archiŭ)

Word2000

Makras ź nia samym lepšym algarytmam pastupovaj zamieny kožnaha symbala padčas šmatrazovaha prahladu ŭsiaho tekstu. Tym nia mienš, apovieść łacinizavanaja za 98 sekundaŭ, u «vierabjach» zastaŭsia apostraf, usie litary, jakija nie ŭvachodziać u kadyroŭku ASCII, aproč «ŭ», pieradajucca ŭ niapravilnaj kadyroŭcy, «ґ» ignarujecca, u niekatorych vypadkach jotavanyja pieradavalisia z «i», kali nasamreč musili być z «j».
Rejtyng: 2.75 (-/1/6/0/4)

Online-łacinizatar: www.knihi.com/lacinizatar/

Napeŭna, samy viadomy i samy papularny online-łacinizatar. Moža łacinizavać nia tolki kavałki tekstu z fajłami, a navat sajty ŭ režymie realnaha času. Ale tut kryjecca zasada: łacinizatar razumieje tolki staronki ŭ kadyroŭcy cp-1251. Staronka ŭ luboj inšaj kadyroŭcy budzie łacinizavanaja niapravilna. Paśla zahruzki «Vaŭčynaj jamy» na server nazirałasia zatrymka ŭ 5 sekundaŭ, paśla jakoj pačaŭ vyvodzicca vynik. To bok apovieść była łacinizavanaja prykładna za čas, roŭny času zatrymki. Zrešty, kali čas zahruzki samoha fajła i atrymańnia vyniku našmat pieravyšaje čas kanvertavańnia, apošni nia hraje značnaj roli. Pamyłki: «vierabi», «u Balońi». Łacinizatar sprabuje aŭtamatyčna vyznačać registar dygrafaŭ, adpaviadajučych vialikim litaram, ale praskokvajuć chiby z inicyjałami. «ґ» ignarujecca, «ŭ» pieradajecca jak «ú».
Rejtyng: 5.0 (4/7/6/4/4)

Online-łacinizatar: www.pravapis.org/latin.asp

Hety łacinizatar pabudavany na regularnych vyrazach i kanvertuje tekst šlacham šmatlikich prahladaŭ usiaho tekstu i zamieny pa adnoj i toj ža litary na jejny łacinkavy adpaviednik. U archivach www.livejournal.com možna navat adšukać zychodny kod na ASP. Apovieść łacinizatar kanvertavać admoviŭsia, skazaŭšy «Request object error 'ASP 0107 : 80004005', Stack Overflow». Maleńkija teksty łacinizujucca, ale nia vielmi jakasna: «vierabi», «u Balońi». Nijakich dadatkovych mahčymaściaŭ, na žal, nie praduhledžana.
Rejtyng: 3.0 (5/0/6/0/4)

Online-łacinizatar: slounik.zolak.boo.pl

Hety kanvertar moža apracoŭvać teksty ŭ niekalkich napramkach, adzin ź jakich łacinizavańnie. Dadzienyja pačynajuć vyvodzicca adrazu paśla skančeńnia zahruzki fajła. Chacia heta śviedčyć tolki pra toje, što funkcyja łacinizavańnia vyvodzić vynik adrazu ŭ płyń vychadu. Tamu padličyć čas kanvertavańnia možna tolki siedziačy na kanale z chutkaściu ŭ nia mienš za 256 KB/sek. Było zaŭvažana, što vialikaja kiryličnaja litara «Й» čamuści nie apracoŭvajecca zusim. Mahčyma heta vyklikanaje mierkavańniem, što ŭ zvyčajnym tekście jana nie sustrakajecca. Taksama «вераб'і» kanvertavalisia ŭ «vierab'i», «у Балёньі» — va «u Balońi», «Заслаўе» — u «Zasłaŭie». Litara «ґ» taksama ignarujecca.
Rejtyng: 4.0 (7/-/5/0/4)

Vyniki

Što ž, čas zrabić peŭnyja vysnovy. Takim čynam:

Biełazar v3.6.2.2015 ****
CyrLat-HTML v1.1 ******
Cyr/Lat Converter v1.10 *****
Cyr2Lat *****
Kirlat *****
Moŭny Kanvertar v2.3 ******
Kir2Lac v2.0.2 ********
Cyrlat ***
Word2000 ***
www.knihi.com/lacinizatar/ *****
www.pravapis.org/latin.asp ***
slounik.zolak.boo.pl ****

Usio-tki fajna, što prablema aŭtamatyčnaha kanvertavańnia kiryličnaha tekstu ŭ łacinku vyrašanaja i srodki jaje vyrašeńnia ŭžo vykarystoŭvajucca. Fajna, što kožny moža lohka i prosta atrymać łacinkavy tekst na asnovie kiryličnaha aryginału. Fajna, što karystalnik moža navat vybrać sabie kanvertavalnik pa svaim huście.

Ale razam z tym krychu žurbotna, što tolki adzinki prachodziać prostyja testy. I navat hetyja adzinki nia mohuć pakul zrabić z kirylicy łacinku takoj, jakoj jana musić być nasamreč. Kanvertavalnikaŭ jašče čakaje doŭhi šlach udaskanaleńnia, jaki jany abaviazkova projduć. Nia siońnia, nia zaŭtra, ale chutka. Raźvićcio ŭžo idzie.

21.11.2004         
Kamentary

Hladzieć usie kamentary ŭ Coredump
Usiaho kamentaroŭ: 4

Alexander Mikhailian

18.02.2005
01:31:47
прывітаньне, kirlat вось тут ляжыць http://www.mova.org/~lowry/
zedlik

18.02.2005
17:21:08
Ага, дзякуй, выправіў.
Чорны дэмбель

06.04.2006
04:02:18
Што заўважыў:
лацінізацыю бех памылак робяць тоькі 2 з разгледжаных. Аднак Cyr/Lat Converter перадузята адсунуты глыбока назад. Тым часам для яго зусім не абавязкова мець Baltic, ды там яшчэ ёсць цікавыя штукі, якіх няма у іншых.
Paweł

30.11.2006
18:21:02
Але чаму распрацоўшчык праграмы для беларускай лацінкі так няграматна піша свае імя і прозвішча - Alexander Mikhailian? Ці можа прозвішча ангельскае і пішацца ў арыгінале?

Dadać kamentar

 
 
 

naviny sajtu
14.03.2015
VMS 2.9.2: adpraŭka na velcom i life, padtrymka pieraniesienych numaroŭ
07.05.2012
VMS 2.9.1: vypraŭlenaja adpraŭka na velcom i life
27.04.2010
VMS 2.9: dadadzieny life i vypraŭleny velcom
02.03.2009
Padtrymka Windows Vista dla Belarusian (Latin) (Custom) Keyboard Layout
usie naviny
 
stužki navinaŭ
RSS
Atom
 
nie pa temie
zedlik. Persanalny błog