драўляны зэдлік   С.Б.Е.Ў.К.: чытай, што пішуць
 


Артыкулы
 
level up!

Ісьціна

Яе шукалі. Глядзелі за хатай, у сенцах, на гарышчы. За ёй беглі да небасхілу, углядаліся ў шэрае неба і выпарвалі сабраныя дажджавыя кроплі. Пераварочвалі камяні, выдзіралі дзёрн, выпальвалі парэшткі ў печах і студзілі іх ледзяной вадой. А яна ўсё хавалася.

Шмат хто знайшоў сваю. Менавіта тую сваю, зь якой яму добра, цёпла і ўтульна. Вядома, кожны са сваёй ступеньню ўпэўненасьці і ўласнай перакананасьці, са сваім стаўленьнем да яе, сваім фанатызмам, сваёй верай у ейную адзінасьць. Шмат скалася душ і лёсаў, каб даказаць адзін адному тое, што ягоная яна менавіта адзіна правільная і адзіна магчымая. Зрэшты, а ці ёсьць яна і якая, ніхто дакладна ня ведаў.

А яна была. Яна існавала заўсёды і заўсёды ейны водар лётаў у небе, напаўняючы паветра часьцінкамі радасьці. Яна была адзінай. Шмат хто наблізіўся да яе, спрабуючы знайсьці. Іншыя шукалі яе ў зусім іншым кірунку. Хаця хто ведае, можа яны таксама рабілі правільна, спрабуючы падыйсьці да яе з адваротнага боку ахінуўшы сьвет. А тыя, хто верыў, што знайшоў яе, або што ведае кірунак, у якім варта рушыць, каб знайсьці, апантана білі сабе ў грудзі і, сквапна глытаючы паветра, спрабавалі схіліць у свой бок хістаючуюся большасьць.

Большасьць ішла сваім шляхам. Туды, куды яе вялі тыя, хто ёй кіраваў. Большасьць, якая занадта лянотная, каб думаць пра правільнасьць шляху і непарушнасьць мэтаў, ішла ў кірунку, пазначаным каляровай шыльдай. Часам ад вялікага натоўпу адколваліся невялічкія групкі, каб збочыць зь нецікавай, прыдуманай дарогі, а часам хтосьці ўліваўся назад у агульную плынь, каб павольна і бесклапотна рухацца ў невядомым кірунку.

Тыя, хто шчыра верыў у сваю рацыю, прысьвячалі жыцьцё перакананьню астатніх у сваім меркаваньні. Зрэдчасу ў іх гэта атрымлівалася, але ў большасьці выпадкаў флегматычны натоўп або ня чуў іхнага меркаваньня, або клаў ніт на яго, проста спажываючы толькі тое, што не патрабуе значнага перавараньня. Але як моцна ня быў кожны з тых упэўнены ў сваім меркаваньні, ён ня мог нават і здагадвацца, дзе знасьці падставы пераканаць у сваіх вар'яцкіх думках яшчэ каго-небудзь, апроч сябе і дзясятка латэнтных. Бо знайсьці аб'ектыўныя і лягічныя доказы яму было незвычайна цяжка. Невядома дакладна, нават ці існавалі яны.

Шмат вады выцякла з часу, калі людзі пачалі прыдумляць сабе ісьціны. Пэўныя ссохлі і адваліліся. Пэўныя перарадзіліся. Пэўныя вытрымалі выпрабаваньне часам. Узьніклі новыя, трывалыя. Зьявілася палярнасьць. Палярнасьць і супрацьстаяньне поглядаў, кожны зь якіх ня быў аспрэчаны.

Магчыма, нехта наблізіўся да яе ўжо вельмі блізка. Магчыма, чыесьці асабістая адносная ісьціна ўжо супала з агульнай аб'ектыўнай. Магчыма, сапраўдная ісьціна знаходзіцца яшчэ вельмі далёка нават ад самай блізкай з тых, што калі знаходзілі людзі. Бо ніхто ня ведае і ня можа ведаць. Ён проста верыць у сваю маленькую-маленькую адносную ісьціну і марыць, прыкладаючы ўсе намаганьні, каб яна зрабілася ісьцінай чалавецтва. Невядома, ці прыдбае яно чаго ад гэтага, бо абсалютная ісьціна ніколі і ні пры якіх абставінах ня будзе дасягнутая. Хочацца гэта камусьці ці не.

Ісьціна ёсьць. І кожны мусіць зрабіць свой крок убок, каб прыкласьці да жыцьця сваю. Каб пераканацца ў ёй, перарабіць яе ці знайсьці новую. Каб не зьвяртаючы ніякай увагі на шэрагі нявызначыўшыхся, ісьці наперад, у свой сьвет. І я спакойны. Бо са мной — мая ісьціна.

5 верасьня 2006         
Язэп Цубербюлер         
Камэнтары

Глядзець усе камэнтары ў Coredump
Усяго камэнтароў: 2

Андрэй

02.03.2008
17:35:34
І ў чым жа Ісьціна?
georgmay

09.12.2009
00:03:36
U tym što jaje niama >_>

Дадаць камэнтар

 
 
 

навіны сайту
14.03.2015
VMS 2.9.2: адпраўка на velcom і life, падтрымка перанесеных нумароў
07.05.2012
VMS 2.9.1: выпраўленая адпраўка на velcom і life
27.04.2010
VMS 2.9: дададзены life і выпраўлены velcom
02.03.2009
Падтрымка Windows Vista для Belarusian (Latin) (Custom) Keyboard Layout
усе навіны
 
стужкі навінаў
RSS
Atom
 
вялікі брат
 
не па тэме
zedlik. Пэрсанальны блог